Lo boxaire Damien Hooper participèt diluns passat als Jòcs Olimpics de Londres amb una camiseta arborant la bandièra dels aborigèns australians; lo Comitat Olimpic Australian li a enebit d’o tornar far. Lo Comitat Olimpic Internacional lo sancionarà pas, mas l’an obligat de se desencusar e d’assegurar que la tornarà pas portar. 
 
Pendent lo combat contra un adversari dels Estats Units, Hooper volguèt representar la siá cultura. “Solide que m’agradariá pas se me sancionavan, mas soi fièr d’o aver fach” çò diguèt Hooper, qu’es lo boxaire de pes leugièr numèro dos del Mond.
 
“Soi aborigèn e representi non solament la miá cultura mas tanben las miás gents. Soi content d’o aver fach” çò afirmèt Hooper.
 
Lo Congrès Nacional dels Primièrs Pòbles d’Austràlia dona lo sieu sosten a Hooper e a dich que lo fach d’èsser obligat de se desencusar es una “foliá democratica”. Dins un comunicat, an dich que lo boxaire a drech de mostrar la siá identitat e qu’es pas obligat de se desencusar per aquò.